SYI"IR TANPO WATON

Astaghfirullah robbal barooyaa * Astaghfirullah minal khotooyaa
Robbi zidnii ‘ilman nafiaa * Wawaffiqnii ‘amalan shoolihaa
Yaa Rosulallah salaamun ‘alaik * Yaa rofii’asy syaani waddaroji
Athfatayyaa jiirotal ‘alami * Yaa uuhailaljuudi walkaromi

Ngawiti ingsun nglaras syi’iran
Kelawan muji maring pengeran
Kang paring rohmat lan kenikmatan
Rino wengine tanpo petungan

Duh bolo konco prio wanito
Ojo mung ngaji Syare’at bloko
Gur pinter ndongeng nulis lan moco
Tembe mburine bakal sangsoro

Akeh kang apal Qur’an Hadiste
Seneng ngafirke marang liyane
Kafire dewe dak digatekke
Yen isih kotor ati akale

Gampang kabujuk nafsu angkoro
Ing pepaese gebyare ndunyo
Iri lan meri sugihe tonggo
Mulo atine peteng lan nistho

Ayo sedulur jo nglaleake
Wajibe ngaji sak pranatane
Nggo ngandelake Iman Tauhide
Baguse sangu mulyo matine

Kang aran sholeh bagus atine
Kerono mapan seri ngilmune
Laku Thoriqot lan Ma’rifate
Ugo Hakekot manjing rasane

Al-Qur’an qodim wahyu minulyo
Tanpo tinulis biso diwoco
Iku wejangan Guru waskito
Den tancepake ing njero dodo

Kumanthil ati lan pikiran
Mrasuk ing badan kabeh jeroan
Mu’jizat Rosul dadi pedoman
Minongko dalan manjinge Iman

Kelawan Alloh kang Moho Suci
Kudu rangkulan rino lan wengi
Ditirakati diriyadhoi
Dzikir lan suluk jo nganti lali

Uripe ayem rumongso aman
Dununge roso tondo yen Iman
Sabar narimo najan pas-pasan
Kabeh tinakdir saking Pengeran

Kelawan konco dulur lan tonggo
Kang podo rukun ojo dak siyo
Iku sunnahe Rosul kang mulyo
Nabi Muhammad panutan kito

Kang anglakoni sekabehane
Alloh kang bakal ngangkat drajate
Senajan ashor toto dhohire
Ananging mulyo maqom drajate

Lamun palastro ing pungkasane
Ora kesasar roh lan sukmane
Den jadang Alloh swargo manggone
Utuh mayite ugo ulese

Yaa Rosulallah salaamun ‘alaik * Yaa rofii’asy syaani waddaroji
Athfatayyaa jiirotal ‘alami * Yaa uuhailaljuudi walkaromi

Al-Fatihah...

Karya : KH. Muhammad Nizam As-Shofa, Lc. *
* Pengasuh Pengajian Kitab Tasawuf Jami'ul Ushul Fil Awliya'
Ponpes Ahlus Shofa wal Wafa' - Krian, Jawa Timur

 Versi audio > http://www.ziddu.com/download/4218582/SyiirTanpoWathon_New.mp3.html